తల్లిదండ్రులు మన్నం నరసింహం, సుబ్బమ్మల పేర్ల మీద మనసు ఫౌండేషన్ ను 2006లో మన్నం వెంకట్రాయుడు, మన్నం గోపీచంద్, మన్నం చంద్రమౌళి ప్రారంభించారు.

2007లో ‘రావిశాస్త్రి రచనాసాగరం’తో మనసు ఫౌండేషన్ ప్రచురణ కార్యక్రమం మొదలయింది. ఇప్పటివరకు పన్నెండుమంది ప్రముఖ రచయితల సర్వలభ్య రచనల సంకలనాలు, రెండు అనువాద గ్రంధాలు వెలువడ్డాయి. తిలక్, కొసరాజు సర్వలభ్య రచనల సంకలనాలకు పూర్తిస్థాయి సహాయసహకారాలు అందించడం జరిగింది. కె.సభా, తిరుమల రామచంద్రల సమగ్ర రచనల సంకలనాలు త్వరలో వెలువడబోతున్నాయి.

2008లో కథానిలయం సహాయ సహకారాలతో పత్రికలు, పుస్తకాల డిజిటలైజేషన్ ను మనసు ఫౌండేషన్ ప్రారంభించింది. 2010లో సినిమాలకు సంబంధించిన సమాచార సేకరణ, డిజిటీకరణ మొదలైంది. 2013నుంచి హైదరాబాద్, బెంగళూరు, గుంటూర్లలో స్కానింగ్ సెంటర్లు ఏర్పాటుచేయడం జరిగింది. 2018, మార్చి 18న నెల్లూరు జిల్లా కనియంపాడు గ్రామంలో కారా మాస్టారుగారి చేతుల మీదుగా మనసు ఫౌండేషన్ డిజిటలైజేషన్ సెంటర్ మొదలైంది. అప్పటినుంచి హైదరాబాద్, గుంటూరు, బెంగళూరులలో స్కానింగ్ కార్యక్రమాలు ఆపివేసి కనియంపాడులోనే పూర్తిస్థాయిలో డిజిటలైజేషన్ కార్యక్రమం కొనసాగుతోంది. 2022 అక్టోబరు నాటికి కోటి పేజీల డిజీటీకరణ పూర్తయింది. 2025 నవంబర్ నాటికి 3కోట్ల పేజీల డిజిటీకరణ జరిగింది.

మనసు ఫౌండేషన్ స్కానింగ్ చేస్తున్న వాటిని తెలుగు పుస్తకాలు, పత్రికలు, తాళపత్ర గ్రంథాలు, శాసనాల నకళ్లు, ఆడియోలు, ఫొటోలు, నెగిటివ్స్ ఉన్నాయి.

సినిమాలకు సంబంధించి… సినిమా పత్రికలు, పాటల పుస్తకాలు, సినిమా నెగిటివ్స్, ఫొటోలు, ఆడియోలు, పోస్టర్లు, వివిధ పత్రికల నుంచి సేకరించిన సినిమాల వివరాలు ప్రత్యేకంగా డిజిటీకరణ జరుగుతోంది.

శాసనాల నకళ్లు స్కాన్ చేయడానికి ప్రత్యేక యంత్రాన్ని మనసు ఫౌండేషన్ సొంతంగా రూపొందించుకుంది. తెలంగాణ పురావస్తుశాఖ వద్ద ఉన్న అన్ని శాసనాల నకళ్లను మనసు ఫౌండేషన్ స్కాన్ చేసి వారికి అందజేయడం జరిగింది. ఆంధ్రప్రదేశ్ పురావస్తు శాఖకు సంబంధించిన శాసనాల స్కానింగ్ త్వరలో మొదలవబోతుంది.

2011లో కథానిలయం వెబ్ సైట్ ను మనసు ఫౌండేషన్ ప్రారంభించింది. ఇప్పుడు అందులో లక్షా 40వేల కథల వివరాలు, 75వేల కథలకుపైగా పీడీఎఫ్ లు లభ్యమవుతున్నాయి.

ఈ కార్యక్రమం నిరాటంకంగా జరగడానికి ప్రత్యక్షంగాను, పరోక్షంగాను ఎంతోమంది సహకరించారు…సహకరిస్తూ ఉన్నారు. ప్రత్యేకంగా పుస్తకదాతల సహాయసహకారాలకు మనసు ఫౌండేషన్ రుణపడి ఉంటుంది.